Walay Gana Nga Mahimong Geisha
Bantay lang ka og imo kong talikdan,
pasagdan nga maghuwat sa pagtaghoy
sa takori inig bukal sa tubig samtang ikaw
makig-indigay ni Basho, magbantay
sa pag-ambak sa baki gikan sa kawanangan
sa imong kahibulong ngadto sa lim-aw
sa imong pagtukaw.
Sa akong pagkutaw
og kape, bantay bitaw og dili nimo
paminawon ang akong laraw: Ako
makigharong sa tirong nga nagsawum-
sawom sa akong kahilum.
Di gyud ko mahadlok. Di ko mamilok
kon imo kong hagiton og pakigdam-ag
sa isig-usa ta ka baybayon.
Unsa man ka? Sukol ka'g rengga?
Konsentidor Ang Konsensya ni Constancia
Samtang imong gi-utaw ang polo
sa imong palahubog nga bana,
siya gatagawtaw samtang nangita
sa pares sa medyas: Hinampak, asa naman?
Hapit na kuno siya ma-late sa iyang
taratat-taratat-taratat trabaho.
Sakto ka nga wala nimo siya tubayi.
Sakto ka nga igo na lang kang nanghupaw.
Sakto ka nga giluom nimo imong tyabaw
dihang nanglupad ang mga aninipot
gikan sa iyang kumo ngadto tugpa
sa imong kalimutaw: Peste kang dako!
Sakto pud baya imong bana. Dili baya gamay
imong kasingkasing alang niya bisan pa'g
kapila ka na miburot. Kapito na baya nilobo
imong tiyan. Lahos na pud sa ikapitong bungtod
kon kwentahon ang gilay-on
sa imong katapusang gakus ug halok
nga mibayaw nimo ngadto sa ikapitong langit.
Ma-ihap pa ang mga bitoon apan dili
ang mga higayon nga nanghupong ka
sa itom ug puwa nga pungpong
sa mga bun-og. Daku ka'g purohan
nga purong-purongan isip hara
sa mga babayeng maglakaw nga magluhod
sa simbahan, nabug-atan sa kadena
sa ilang rosaryohan. Bulahan ka
sa babayeng tanan nga nag-ambahan unya
tungod kay walay kunot ug puti kaayo
ang polo sa imong bana nga espoting kaayo
sa iyang pagposing, sa iyang kahilum
nga wala'y katapusan diha sulod
sa iyang lungon. Ila kang i-ampo
human nimo siya gibuno.
Nganong Dili Molingi Bisan Sitsitan
Ang Babayeng Ganahan Magpakigol?
Sa iyang pagpakipot,
samtang nanghagit ang iyang sampot,
buot gyud niya nga mosunod
silang tanan nga dila ra'y labod
kon malibat sila inig labang sa dalan
ug magsiga ang mata kay naligsan.
No comments:
Post a Comment