Bisan dili pa ko nimo dad-an
og kalamay sa Bohol, sige lang.
Dili ko mangluod bisan
dili ko nimo sugiran bahin
sa mga iho nga mibirig
sa panganod sa Panglao diha
sa mga balud sa imong kalimutaw.
Bisan dili ka magsaba
nga gitaghoyan ka sa estatuwa
ni Dagohoy, bisan imong ihilum
nga gisundan ka sa anino
ni Cesar Montano, okey lang.
Kanunay kong andam pagluhod og
baklay ngadto sa simbahan
sa Baclayon, ug mahimo nakong
patagon ang Chocolate Hills
basta mobalik lang ka’g dali diri
diin magkamuritsing ko kanunay
sa halok mong espiso pa sa kalamay.
No comments:
Post a Comment