11/17/2009

naa-an nga ungo si Temistokles Adlawan









Bitaw, lupig pa’y Buwanon
ang apilyido ining kanahan bisan suwaw
iyang kabantog, lanog pa sa kampana
sa simbahan sa Naga.

Matay pa, wala gyo'y kalainan sa dan-ag
sa tingtakdol ang mga takna kon palaran ka
nga siya ikakuyog. Ikaanggid imong pamati
sa kiat nga tig-ik sa mga nagduwa’g
tubig-tubig. O, sa kidhat sa haranista
nga di gyod motagam bisan ang ikadalit
sa biyuda nga gihalaran mao ra
ang kainit sa gisabyag nga orinola. (Mao gani
nga wala uroy siya ganahi magpauraray
sa Amerika, nibalik gyod sutoy sa tinubdan
sa iyang kapungot ug kahimuot.)

Ay, tuyhakaw gihapon ang mga kikik
sa iyang agik-ik bisan kanunay pod
mangalagpot ang mga kabog
sa iyang pagmahay: Ang anak
nga burokinto. Ang mga kagwang
ug mga kuwang-sa-dukol nga politiko
nga kon masaag ug mabagatan
sa iyang traysikol didto sa makahubak
nga dalan sa Pangdan lagmit
iyang ligsan. Ang dalaga nga igwad
og linaktan samtang gayatak
sa iyang dughan. Mga hambogero
sa tubaan nga wala’y pakabana
ug wala'y panghilam-os sa pulang
sugwak sa iyang mga sumbingay.

Ay, ang wakwak sa iyang mga balak!
Mao bitaw ni hinungdan sa iyang pagpuwaw
og pangawot hangtod gakalkag ang iyang ulo.
Sigon pa sa iyang mga silingan, kanunay
sa bintana sa iyang payag sa bungtod
masiplatan ang iyang anino sa bungbong
gabawog ug giinat sa dila sa iyang
lamparilya. Gahangak ang mga iro,
gauwang duyog sa naglagaak nga mga ngipon
sa iyang karaang makinilya, mahunihon
nga nagkitkit sa kagabhion.

5 comments:

rey said...

dear myke,

pastilan, nalingaw ko ani da. naghinam-hinam na noon ko kung unsay balak nimo bahin ni januar, ohmar khalid, o di ba si sir edgar godin.

kung ako'y silingan ni Temistokles ma-aan pod nako siya nga abat.

pastilan, ingon gyod na ana ang mga magsusulat?

imong fan,

rey

Ma. Milagros said...

A fitting tribute to Tem's life and art. God receive his soul.

ester said...

Nakaadto sad mi sa iyang balay sa bakilid sa Naga ug giandaman mi niya ug tinulang manok. Sigi lang siyag ngisi, morag pirmeng may tiaw sa iyang hunahuna. Sakto kaaayo ang imong mga balak, para nako, si Tem usa sa lima ka labing maayong magsusulat sa atong pinulongan.

Admin said...

hi.. nangita ko ug bisaya bloggers for exlinks.. pwede ta ex links..laag nya sa akoa blog ha..

Tickle Thy Thoughts

King4tech said...

hi, exchange link here www.cebucircle.com Thanks!