11/29/2008

dapit sa atong panagtagbo: pagdangaw sa langit ug lanaw










Kon dili ko kutasan og kisaw
Alirong niining puting lanaw

Nga akong giatubang, mahitabo nga magyunyon
Sa akong singot ang nag-apong nga panganod
Sa mga pulong. Layat unya dinhi. Dagan dayon
Sa wanang sa tubig. Dili ka maunlod. Tuhoi ko.
Modailos tang duha kon takos kang magpaanod
Pag-aninaw sa imong kinahiladman. Nia’y hilo

Sa atong pagtinul-tulay. Ikaw
Ang tabanog: tingog nga lutaw
.

twang: dihang nakahimamat ko og usa ka bisaya nga bag-o pang niabot sa amerika, ug unsa’y buot unta nakong ibanghag niya atol sa usa ka panagtipon









Gaung-ong iyang dila, taman
Sa ginhawa, sa iyang ilong.
Ay, slangards iyang sinultian

Bisan pa’g dayag nga sumpay
Sa tinai sa among kaliwat
Ang yawit sa akong pagtubay.

Ug bisan hapit na siya mosuka
Nitagay gihapon ko, niyango:
Twanggol kang tawhana ka!

11/23/2008

giam-aman sa magbalantay nakong pak-an











matultolan ra lagi nimo
ang dalan padulong
sa damascus kon ikaw
takos magtiniil dalikyat
pwera buyag sa balay
sa mga borikat dayon
mahinamong mogawas
nga hukas sa kalsada
mosugat sa prosesyon
ug magpaligis sa karosa

sanglit sulondon ang mga malapason










lagmit nakatunob si inday og piraso
sa tunokong paraiso morag nakasugat
og halas kay kalit nihunong duol sa anino
sa mansanitas dihang nakaalinggat
sa iyang pag-inusara sukad gitawag siya
nga kapayason kay nitibi intawon nunot
sa pasangil nga maoy nakaingon nganong
gikamatis si ondong gikan siya nagpatuli
tulo ka adlaw ang milabay sa wala pa
gipangtigbas ang kalibonan padulong
sa kilum-kilom sa ilang pamayabas

11/19/2008

bahad kutob sa ikatulong ihap ug ang saad nga akong barogan sa ikaupat nga balibad










dili ko

mosupak kon nag-awas
imong ngabil sa duga
nga gipuga gikan sa medyas
ug sapatos ni sophocles

dili ko

makiglalis kon napangag
ug nahiwi imong bag-ang kay
giusap nimog apil ang garter
sa purol ni schopenhauer

dili ko

magbagutbot kon nahibat
imong pustiso dihang kini
nabitik lakip imong bungot
sa sudlay ni sylvia plath

dili ko

apas-sumpay sa hunghong nga sugilanon alang sa malinawong managhigugmaay ni gustav klimt










Diha’y nagbangga sa unahan. Natanggong ang mga sakyanan lakip ang panon sa mga nagbangotan. Nakahigayon og panaghoy ang drayber sa purlon.

Kapin sa usa ka oras na ang nilabay, ug nanghuy-ab ang naghigda sulod sa lungon. Naminhod iyang kamot og hupot sa rosaryohan. Nibangon siya. Nisutoy laktod ngadto sa sunod niyang kinabuhi. Nagpanilap siya sa kahinam, ug ukal kaayo iyang gininhawa. Sa iyang kadanghag, nasabod niya ang duha ka iro nga wala pa mag-ukang sa ilang habal. Nahapla siya, iyang ngabil nabagnos sa yuta.

Piyong, ayaw kahadlok. Tagamtama ang tinuod ug wa'y kamatayong halok.

11/12/2008

usahay, usa ka borikat ang kalipay











Puti ko’g itlog
kon di ko mobarog ug wa’y ikasukol nga kidhat
batok sa hudlat sa kaguol nga bisan pa man
pula og mata
kanunay budlat nga nagtukaw. Naniid kon asa
kutob akong paghuwat sa kalipay nga bisan
itom og kigol
igwad kaayo sa iyang kiaykiay lahos sa eskina
sa akong kahadlok: Nanaghoy, nagtingsi bisan
lagom og lagos.

stigmata










Andam kong molamano
bisan anang mga berdugo
nga bugnaw'g dugo. Takos pod
mangahas og kupot sa Kamot

nga gilansang sa krus. Bitaw, unta
makab-ot nako ang kalinaw.

Apan samtang gihanduraw nako
ang mga pulong ni Gandhi,
gagilok akong dunggan,

gihunghongan sa lamok nga
ganiha rang galiyok-liyok
ibabaw sa akong ulo

hangtod labaw pa sa kilat ang kalit
nga hakop—pinapilit wa'y kalainan

sa pag-ampo—sa akong palad
diin ang hangol nga pak-an
nagtingkagol, nagkampat
og pula sa iyang pagkapisat.

11/03/2008

Romansalida










Kutas kaayo ang mga talan-awon diha sa telon:
Sinagpaay, sinumbagay, pinusilay, dinunggabay.
Apan bisan unsa pang matang sa kapintas lakip
Ang kurat lahos sa kigol tungod sa mga aliwas,
Abat ug multo--nanamin sa kalibotang’ mopatindog
Bisan sa bulbol--di ko mopiyong. Molingiw pod ko
Sa mga ngiob nga dapit diin gakitiw ang mga kamot
Ug gadanlog gyod ang mga dila, ngabil, ug panit
Sa mga parisan sa suok. Kalit silang mag-ukang,
Makugang sa sabwag nga kahayag sa kataposan.

Pasidungog sa Paningkamot nga Kinasingkasing, Gitago ug Wala Gipanghambog










Isul-ob sa ulo, imaskara nako akong brief
nga busloton kay wala ko’y nawong ikaatubang
sa Ginoo kon magpakabuhi ko nga dili mainiton
sa pag-amping og kupot sa kahinam. Sulondon
ang pagbantay sa kawatan nga wala pa hiilhi
kay wa’y nakasaksi dihang nanughit--pakapin
og panguros--sa mga hinayhay nga panty.


Tulo ka Kandila Pinatulo sa Panit nga Katol

"Gituohang tungod lang sa kagid sa bugan, 20-anyos nga dalaga naghikog didto sa lungsod sa Ronda, Sugbo. Nakaplagan siyang patay nga naghigot og pisi sa iyang liog… way nakitang laing hinungdan sa iyang paghikog gawas lang sa mao nga sakit.” – Sun.Star SuperBalita, Agusto 24, 2008










i

Naa’y daghang mobikangkang og baligya, bugti sa katahom,
sa ilang kalag. Nangiyawat intawon nga wala na’y kilom-kilom

nga modasmag ug mohimamat sa ilang pag-atubang uyon
sa samin. Tan-awa, mabu-ak pod ang tamboanan sa lungon.

ii

Pastilan, day. Pahinungdan ko unta ikaw og panghupaw
sa pagmahay. (Nganong gigitik man nimo ang tigkulit
sa lapida dihang ang panit sa semento iyang gisamaran
sa imong ngalan?) Pasagdan ko na lang ang mananabtan
nga makamatikod-- samtang galitanya atubang sa altar
diin hayag kaayo ang kahamis sa kutis sa mga rebulto--
nga siya dugay na dia’y pod, susmaryosep, wa’y panghinguko.
Pabawnan pod unta siya sa sobra sa imong limos aron unta
mag-igo iyang itunol bugti sa kaayo sa manikuristang bungi.

iii

Nangatol akong kamot og tagay alang sa tigkawot ug tighabwa
sa mga lubnganan. Pasayloang' manghunaw ko sa imong luha.

Kon Di Ka Mobasa, Magbasol Ra Unya Ka Inig Sugod sa Akong Kataposang Katawa










Kinsa’y nakasaksi sa baki nga niambak padulong sa buwak?
Nikisaw sa tubig ang akong kamingaw. Buot motupong nako

Ang mga balili samtang gisakdapan ko sa kahilom. Taghoy.
Sa utlanan niining linya, ang tuldok mahimong buyog.

Kon unsa ang iyang ihunghong, mahimo kining ipalanog
Pinaagi sa pagtilap sa kiting sa ting-init. Kon mopiyong ka,

Wa ka’y katungod mokutlo ug mopungpong sa mga pulong.
Kon di ka motuo nako, di pod ka magmalipayon hangtod

Sa kataposan. Bisan kon ang baki mahimong balak, di gyod
Mahimong dugos imong luha. Ulod ra nimo’y magbanha.

Dihang Nisanong Ko sa Wa'y Tumong Nga Pagdapit sa Duha ka Wa’y Buot Aron Ko Mohunong

(alang nilang Gabriel Ollivan ug Raphael Gandalf)










Usahay, sulondon pod ang pag-unay
og patid sa kaugalingong tiil. Bulahan sab
gihapon ang mga danghagan, labi na gyod kon
gikubalan ug kanunay lang mapandol ang saag
nga panumdoman. (Asa ug kanus-a hipalgan
ang tugkaran sa mga kiat?) Ambot kaha kon
mahimamat nako pag-usab ang kalunsay
sa buot ipasabot niining mga pulong
wa’y kalibotan. Tan-awa ang kahapsay
sa mga balili ilawom sa tunob sa bungotong’
hardinero. Bisan wa kakita’g higayon
pagpamalbas, ang tuhik-tuhik sa iyang gunting
punting kaayo sa mga sagbot nga igo ra gyod
gasunod sa kinaiyang balaod sa pagtubo
bisan asa. (Unsa’y labot nila sa hulga
nga hikog ug inanay nga pagkasunog
sa atong planeta?) Paminawa ang wa’y kutas
nga kabanha sa duha nako ka liwat nga sipat.
Ang katag nilang katawa. Ug ang nangudlot
nga balikas diha sa takla sa akong dila nunot
sa pagkatakilpo dihang natumban nako
ang nagpasad nilang mga duwaan.

Kaugalingong Labok sa Maayong Laki Mounay og Hapuhap sa Iyang Kalaay Pahinungod sa Tanang Babaye nga Wala Intawon Niya Masapnay










Nanggimaw ang kuko
Sa kahidlaw. Palayo na lang mo.

Pasagdi kong’ mag-alindasay.
Ngano man diay kon dili ko

Kamo mahikap? Igo na
Nga gitudloan ko ninyo

Unsaon pagkumkom sa gihay
Sa inyong gilay-on. Pasagdi

Nga sumpayan sa singot
Ang akong laway. Barogan ko

Bisan kurog kining akong
Paningkamot nga makab-ot

Ang kinatumyan sa katagbaw
Hangtod mokinto ko supak

Sa kamingaw nga wa’y utlanan.
Ingon ini ang pagpakpak

Sa nag-inusarang palaran.

Kapyot sa Kaluwasan










bisan pa'g gihangaran ug giila
ang bandila sa mga banggiitan
nakigtigi ug nasaghiran sa huni

sa balhibo sa banog ug buwitre

bisan gawarawara sa hangin nga
habog sa pag-inusara labaw pa
sa kamingaw sa usa ka bantayog

angay pod ning ipakayab uban

sa linabhang nuog nga mao pa'y
pagkatilaw intawon og kaluwasan
bisan sa makadiyot lang samtang

gakapyot sa linya sa hayhayan