11/14/2005

Biyernes, Ika-17 Sa Marso, 1995


(sa pagtaliwan ni Flor Contemplacion)


Karong buntaga, bulok-abo
ang tunga sa garapong asukar ug daw
bato ang gibug-aton sa pan de sal.

Nganong wala motuktogaok ang hiniktan?

Taud-taud nang nanghuy-ab
ang taknang tak-om nga bintana, mikalawat
sa alimyon sa kalatsutsi.

Nanglutaw ang pila ka lugas sa hulmigas

pagkutaw nako sa sikwate. Nagpasad
sa gawas ang mga nangatagak nga
buwak. Kini puniton tagsa-tagsa

dili aron hagkan. Pungpongon kini, unya

hiktan og hugot. Ayawat na lang kalingawan,
itakyan sa mga bata kon wa’y mosangpit,
hangtud mabugnaw ang painit.

No comments: