11/12/2005

Usa Ka Gabii Sa Larsian, Nabutdan Ko Sa Mga Bitoon


Dali ra ka malipong, ingon ka. Dali ra ka maluya.
Apan, day, nganong wala mo balibari ang akong gitagay.

*

Imong gisagola’g Sprite ang duha ka basong
beer.
Imong gisawsawa’g ginisal nga hipon ang mga hiwa-hiwa
sa hilaw nga mangga.

Imong gisagolan, imong gisawsawan og suka’g patis
nga miwaswas sa dila kong naamang sa kahalang
‘ning dughan.

*

Lisod kan-on ang puso kon dili hiwaon,
ug ang siling kulikot nga tingali sama kapula
sa kasingkasing dili makatimpla sa parat ug aslom
kon dili kusniton.

Sultian tika. Sama nimo dali sab ko maluya.
Dali sab kong malipong. Sama karon sa imong
pagtungab samtang gahabhab ko ug gasumsom
og barbekyung bitoon.


(1st Prize, "Unang Indigay Sa Pagtagik Og Balak Sa Gugma," dyLA, Feb. 1997)

No comments: