11/14/2005

Sa Colon, Wala’y Naminaw Sa Magwawali Samtang Nagsingabot Ang Orasyon


Gadagan-dagan taliwala sa dalan,
ang babayeng buang nagsabak
og kagutom. Siya mipahiyom samtang
nagkombera ang mga bosina. Nangidhat

ang pulang suga, nalunhaw ug kalit
natagpilaw ang mga ligid padulong
sa kasadpan. Daw mga pako nga mibag-id
sa aspalto ang tiningob nga tingog

sa mga tunob ug tambutso. Unsa’y nabati-an
sa buta nga nagluhod kilid sa MetroBank?
Iyang dunggan namagtok sa abog ug sa pagpaabot
sa paghaguktok sa limos sulod sa gihuptang lata.

Gibulsa sa panganod ang buwan nga daw panas
nga piso. Tingali sa iyang tungod, mi-agi
ang mga manulunda kay nikalit lang siya
pagpanguros. Sa iyang atbang, nangawot

sa iyang bugan ang babayeng nangunot
ang aping sa ngising pinugos. Naminhod iyang
tabuntabon sa tanto niyang kidhat. Iyang giduol
ang buta, ug gihunghongan. Ug samtang

nangampana ang dila sa mga tiki,
mibagting-halok sa yuta, misayaw
ang buang. Mikatawa. Ang iyang mata
nanggilak sa tanang wala ikahilak.


(1st Prize, Bangga sa Pagsuwat sa Dagang Foundation, 2004)

No comments: