11/14/2005

Oblasyon


(alang sa tanang dili motuo)


Dupa. Padungga ang kangitngit
sa pangilaba nga sama kaputli
sa ngilit sa pinuti. Patubaga

ang mga manulunda sa kahait
sa imong hagit ug sa panganti

nga mopulpog sa panganod. Dupa,
dayon padunggab sa kilat. Kini
duna’y kahayag nga molugit

sa imong kalimutaw aron dili mo
kalimtan unsaon pagpiyong kon

magpadayon ang mga manulunda
sa ilang agik-ik. Busa bawos. Sila
pagitika. Ilok ihalad. Dupa.

No comments: