11/12/2005

Unsay Akong Ikumpisal?


Mohunghong ta ko nimo nganong
mora’g gigitik ang duha ka iring
duol nato, ang ilang mga tingog daw
gibitik sa ilang ikog samtang gatyabaw
sa ilang kahidlaw.

Sultihan ta tika kon unsa’y
misilaw sa opaw sa gwardya dihang
iya tang nasiplatang nagsikit
sa ngitngit nga hagdan sa kumbento
luyo sa Redemptorist.

Motug-an ta ko nimo kinsa’y
akong giilis sa anghel nakong magbalantay,
kon unsa’y akong pangilaba sa Birhen
sa Regla samtang nahilis
ang mga kandila.

Apan samtang ang akong dila
gadilaab diha sa imong dunggan, dailos
sa imong tangkugo, tadlas sa imong liog, lahos
sa imong ngabil, unsa pa’y akong
itug-an, isulti, ihunghong?

No comments: